Os Premios Mil Primaveras, recoñecidos nos IV Premios Alfredo Iglesias

O Hotel Congreso, nas Mámoas de Motouto, en Teo, acolleu na tardiña do 16 de xaneiro o acto de entrega dos IV Premios Alfredo Iglesias, promovidos pola desaparecida revista Coralia e o deseñador Alejandro Regueiro.

Nesta cuarta edición recoñecéronse as seguintes persoas e colectivos en diferentes categorías:

1. Escrita: María Pilar García Negro
2. Música: A Banda da Loba
3. Acción patrimonial: Manuel Gago
4. Comunicación: Avelino González
5. Ilustración: Olalla Diéguez Boo
6. Acción cultural: Asociación Cultural A Mámoa
7. Ciencia: José Pereira Uzal
8. Artes: Rafael Romero Masiá
9. Acción solidaria: Solidariedade Galega do Pobo Saharaui
10. Acción social: Asociación de Pais de Persoas con Diversidade Funcional de Teo (Aspamite)
11. Artesanía: Oli Xiráldez
12. Traxectoria: Manuel Quintana Martelo
13. Moda: Dolores Couceiro
14. Gastronomía: Adegas Vía Romana
15. Promoción da lingua: Premios Mil Primaveras da Coordinadora de Traballadores/as de Normalización da Lingua
16. Premio á memoria: Moncho Díaz, de Fuxan os Ventos
17. Artista revelación: Hydn
18. Personaxes do ano: Víctor Manuel Oujo e Ángel Currás (@oveyanejra)

 

Os Premios Mil Primaveras, recoñecidos na categoría de promoción da lingua

A cuarta edición dos Premios Alfredo Iglesias recoñeceu esta iniciativa da CTNL na categoría de promoción da lingua.

Os Premios Mil Primaveras naceron no ano 2019 coa finalidade de valorar, recoñecer e difundir accións, campañas, programas e proxectos que teñen como obxectivo principal a posta en valor e o fomento da lingua e a procura do incremento do seu uso e/ou prestixio.

Os obxectivos dos Premios Mil Primaveras son:

1. Recoñecer o traballo ben feito no ámbito da normalización lingüística.
2. Transmitir unha imaxe positiva do labor de promoción do uso e prestixio da lingua.
3. Valorar externamente accións, proxectos ou campañas, seleccionar as mellores e sinalalas como modelos que poden ser imitados.
4. Difundir o traballo que se realiza a prol da lingua galega.

Os Premios Mil Primaveras promóveos e organízaos a CTNL coa colaboración económica da Deputación Provincial de Pontevedra.

Nestes momentos os Premios Mil Primaveras teñen aberta a inscrición na súa sexta edición, que pechará a recepción de candidaturas o 31 de xaneiro. Nas cinco edicións anteriores recoñecéronse 28 proxectos, que poden consultarse neste web, na sección de proxectos premiados.

Recolleron o premio en nome da CTNL a súa presidenta, Mónica Fernández Valencia, e a vogal Anxos Sobriño, que aproveitaron para destacar a xenerosidade das persoas e entidades participantes, que comparten connosco a planificación, o deseño, a execución e a avaliación do seu labor de promoción da lingua.

Os Premios Alfredo Iglesias lembran a figura de Alfredo Iglesias Otero, artista multidisciplinar falecido o 16 de xaneiro de 2021.