Nova convocatoria do Premio ao Proxecto de Webserie en Galego no Carballo Interplay
O Carballo Interplay convoca unha nova edición do Premio ao Proxecto de Webserie en Galego, creado co obxectivo de incentivar e fomentar a creación e a difusión de contidos audiovisuais en lingua galega en Internet.
CARACTERÍSTICAS DOS PROXECTOS
Os proxectos candidatos a este premio deben reunir as seguintes características básicas:
- Deben ser creacións audiovisuais propias e orixinais.
- Poden ser de imaxe real, animación, stop motion, técnica combinada etc.
- As creacións audiovisuais deben estar pensadas para seren publicadas e difundidas a través de Internet e mediante capítulos, episodios ou partes (como mínimo tres).
- Non hai ningún tipo de restrición de temática, xénero, estilo, nin persoas destinatarias, sempre que non conteñan ningún tipo de contido ofensivo contra ninguén.
- Deben ser gravadas orixinalmente en galego e esta debe ser a lingua do seu título e créditos.
PREMIO
O premio ten unha dotación económica de 3000 euros e deberá destinarse exclusivamente á produción de, polo menos, tres capítulos da serie do proxecto premiado. O premio estará suxeito ás posibles retencións fiscais que a lei estableza.
PRAZO
Poderán presentarse proxectos dende a publicación das bases (BOP da Coruña do 15 de novembro) ata o 15 de marzo de 2020.
PROXECTOS PREMIADOS EN ANTERIORES EDICIÓNS
Esta convocatoria creouse no ano 2016 e deste entón premiou os seguintes proxectos:
- Ano 2016: Peter Brandon de Porco Bravú
- Ano 2017: Hai vida en Bran? de Ángela Andrada.
- Ano 2018: Sígueme de Nuria Cancela, Alba Pego, Laura Pose e Aitor Ramos.
- Ano 2019: concedeuse o premio a dous proxectos, Xan e Amnesia 3.0.
O Carballo Interplay tamén inclúe dentro da competición xeral un premio á mellor serie en versión orixinal en galego xa producida, dotado con 800 euros de premio e trofeo. A data límite para a inscrición nesta categoría é o 16 de febreiro. Foron premiadas en anteriores edicións:
- 2014 e 2016: Poetarras
- 2015: Fame
- 2017: Teño unha horta en San Sadurniño
- 2018: Monumento
- 2019: As cousas do Choio