Industrias Cárnicas Fontefría, DiE Gabinete Técnico e Máis Vida, recoñecidas co Premio Ponteareas, Lingua e Empresa

O Concello de Ponteareas acaba de anunciar as empresas gañadoras da primeira edición do Premio “Ponteareas, lingua e empresa”, unha iniciativa das concellarías de Cultura e Lingua e de Promoción Económica, co obxectivo de recoñecer publicamente o uso e fomento do galego por parte de empresas, autónomos e profesionais que teñan a súa sede social ou un centro de actividade no municipio.

A convocatoria estableceu tres categorías:

• uso continuado da lingua galega
• incorporación recente ao uso da lingua galega
• traxectoria do uso da lingua galega ao longo de décadas

 

DiE Gabinete Técnico, premio ao uso continuado da lingua

Polo uso continuado e exclusivo da lingua galega na súa actividade profesional, o xurado recoñeceu a DiE Gabinete Técnico, que ademais destaca pola repercusión que ten sobre a creación dun corpus lingüístico de documentos técnicos en galego presentados perante organismos como o Rexistro da Propiedade ou notarías, o que favorece que os usuarios e usuarias teñan a posibilidade de ter documentadas as súas propiedades en galego.

 

Máis Vida, recoñecida pola incorporación recente ao uso da lingua galega

Na categoría de incorporación recente ao uso da lingua galega, foi premiada Máis Vida pola súa contribución a visibilizar o galego dentro do eido da saúde e por axudar a gañar novos espazos de uso para a lingua galega a través dunha actividade que chega a amplas capas da sociedade.

 

Industrias Cárnicas Fontefría, premio á longa traxectoria

Pola súa aposta e longa traxectoria no uso da lingua galega ao longo de décadas etiquetando os seus produtos en galego, levando o idioma galego ás grandes superficies e áreas de distribución tanto en Galicia como fóra dela, emitindo tíckets de compra en galego, na rotulación estática das tendas e na publicidade móbil dos seus vehículos de repartición, foi recoñecida Industrias Cárnicas Fontefría. O xurado salientou a importancia que estas actitudes teñen para o prestixio social da nosa lingua no ámbito socioeconómico xa que achega a lingua aos consumidores e consumidoras e favorece unha receptividade favorable ao seu uso na sociedade.

 

Nun acto de entrega que tivo lugar o pasado 5 de novembro, as empresas premiadas recibiron un diploma e unha peza escultórica do artista pontareán Silverio Rivas.