Premio a proxecto de serie en galego do Carballo Interplay 2021

O Festival de Contidos Dixitais Carballo Interplay, na súa 8ª edición, que terá lugar en Carballo do 8 ao 11 de setembro, convoca o premio a proxectos de serie en galego. A finalidade deste premio é incentivar a creación e a difusión de contidos audiovisuais orixinais en lingua galega en internet.

 

CARACTERÍSTICAS DOS PROXECTOS

Os proxectos candidatos a este premio deben reunir as seguintes características básicas:

• Deben ser creacións audiovisuais propias e orixinais.
• Poden ser de imaxe real, animación, stop motion, técnica combinada etc.
• As creacións audiovisuais deben estar pensadas para seren publicadas e difundidas a través de Internet e mediante capítulos, episodios ou partes.
• Non hai ningún tipo de restrición de temática, xénero, estilo, nin persoas destinatarias, sempre que non conteñan ningún tipo de contido ofensivo contra ninguén.
• Deben ser gravadas orixinalmente en galego e esta debe ser a lingua do seu título e créditos.

 

PREMIOS

O premio ten unha dotación económica de 3.000 euros e deberá destinarse exclusivamente á produción de, polo menos, tres vídeos da serie do proxecto premiado.

 

PRAZO

Poderán presentarse proxectos dende a publicación das bases (publicadas no BOP da Coruña do 9 de febreiro de 2021) até o 31 de xullo de 2021.

 

PROXECTOS PREMIADOS EN ANTERIORES EDICIÓNS

Esta convocatoria creouse no ano 2016 e deste entón premiou os seguintes proxectos:

• Ano 2016: Peter Brandon de Porco Bravú
• Ano 2017: Hai vida en Bran? de Ángela Andrada.
• Ano 2018: Sígueme de Nuria Cancela, Alba Pego, Laura Pose e Aitor Ramos.
• Ano 2019: concedeuse o premio a dous proxectos, Xan , escrita por Miguel Canalejo e dirixida por Lucía Estévez, e Amnesia 3.0.
• Ano 2020: Cacola, de David Fidalgo Omil

O Carballo Interplay tamén inclúe dentro da competición xeral un premio á mellor serie en versión orixinal en galego xa producida, dotado con 800 euros de premio e trofeo. A data límite para a inscrición nesta categoría é o 15 de xuño de 2021. Foron premiadas en anteriores edicións:

• 2014 e 2016: Poetarras
• 2015: Fame
• 2017: Teño unha horta en San Sadurniño
• 2018: Monumento
• 2019: As cousas do Choio
• 2020: Os 20 do XX