II Premio Xela Arias

A Asociación Galega de Profesionais da Tradución e da Interpretación (AGPTI) abriu a recepción de candidaturas para a II edición do Premio Xela Arias, recoñecemento que naceu no 2018 para recoñecer o labor de empresas, entidades ou persoas que contribúan á promoción do uso do galego no mercado da tradución e da interpretación en todos os sectores económicos.

Os obxectivos do premios son:

• pór en valor a profesión dos tradutores e intérpretes e o galego como lingua de traballo e
• dar a coñecer o nome de Xela Arias (1962-2003), figura destacada na tradución ao galego e responsábel das versións na nosa lingua de obras de James Joyce, Gianni Rodari, Jorge Amado ou Roald Dahl.

 

Recepción de candidaturas e entrega do premio

O período de recepción de candidaturas rematará o día 15 de setembro. Para enviar unha candidatura só é preciso enviar un correo electrónico a info@agpti.org.

Un xurado, do cal formará parte María Alonso Seisdedos, gañadora da edición anterior, escollerá o gañador ou a gañadora desta segunda edición, decisión que será anunciada o día 30 de setembro co gallo do DIT, o Día Internacional da Tradución.

A entrega do premio será, como o ano anterior, durante a feira Culturgal.