Preséntanse 23 proxectos de normalización lingüística aos III Premios Mil Primaveras

Tras a convocatoria aberta o 3 de novembro de 2021, co derradeiro día de xaneiro de 2022 finalizou o prazo para inscribir proxectos nos III Premios Mil Primaveras a proxectos de posta en valor e fomento do galego. Nesta terceira edición dos premios recibíronse un total de 23 candidaturas de servizos de normalización lingüística, equipos de normalización e dinamización da lingua galega, asociacións e outras entidades.

Das propostas candidatas, con moita variedade temática e de destinatarias/os, sete foron inscritas por servizos de normalización lingüística de entidades locais, cinco son accións desenvolvidas en centros educativos e 11 foron presentadas por outras entidades públicas e privadas (principalmente asociacións e empresas).

Entre as campañas presentadas, a maioría iniciáronse nos últimos tres anos (15), e en concreto 10 accións naceron no ano 2020. Hai tamén proxectos consolidados con ampla traxectoria, que pode chegar até máis de 10 anos.

 

Xurado e categorías

Nos vindeiros días a CTNL nomerá o xurado que seleccionará as campañas que serán recoñecidas nesta terceira edición. De acordo coas bases, estará formado por técnicos/as de normalización lingüística e persoas con recoñecida capacidade en ámbitos como a planificación lingüística, a intervención social, a xestión de proxectos sociais e/ou a comunicación. O xurado escollerá as campañas de acordo coas seguintes seis categorías:

• Premio ao mellor proxecto estabilizado: entre aqueles que se leven desenvolvendo durante, polo menos, cinco anos.
• Premio ao mellor proxecto novo: entre aqueles nacidos en 2019 ou despois.
• Premio á mellor comunicación e impacto: entre os que acadasen un grande impacto social e supuxesen un modelo positivo de comunicación.
• Premio ao proxecto máis innovador: entre os que mostren innovación na súa maneira de intervir, na súa linguaxe, no seu ámbito de actuación etc.
• Premio ao mellor proxecto de fomento do galego na infancia e/ou mocidade: entre aqueles que teñan como obxectivo principal a socialización en galego da infancia ou da mocidade, como poboación destinataria prioritaria na normalización lingüística para garantir o futuro da lingua.
• Premio ao mellor proxecto de fomento do galego nun ámbito sectorial (por exemplo, no ámbito socioeconómico, no das novas tecnoloxías, no audiovisual etc.): entre aqueles que teñen como obxectivo principal a procura do incremento do uso e/ou prestixio do galego nun ámbito sectorial concreto.

Os Premios Mil Primaveras non teñen dotación económica. Consistirán no recoñecemento e na ampla difusión das accións, programas ou proxectos escollidos polo xurado.

Para axudar a dar a coñecer os proxectos premiados, organizarase un acto público de entrega e as candidaturas seleccionadas polo xurado estarán dispoñibles para a súa consulta detallada no web www.milprimaveras.gal, onde agora se poden consultar os 13 proxectos recoñecidos na primeira e na segunda edicións. Tamén se difundirán os proxectos premiados a través das canles habituais de difusión da CTNL (redes sociais, web etc.).

 

Os III Premios Mil Primaveras promóveos e organízaos a CTNL coa colaboración económica da Deputación Provincial de Pontevedra.