Novas

Onte mesmo, ás 23.59 h, finalizou o prazo para presentar proxectos, campañas, accións ou programas de normalización lingüística na segunda edición dos Premios Mil Primaveras a proxectos de posta en valor e fomento do galego. Inscribíronse un total de 37 candidaturas de servizos de normalización lingüística, equipos de normalización e dinamización da lingua galega, asociacións e outras entidades.
 

A Asociación Cultural O Bardo e o Concello da Estrada resolveron a trixésima edición dos seus premios de normalización lingüística. A Asociación Cultural Vagalumes e A Banda da Loba foron as entidades recoñecidas respectivamente nas modalidades de "A Estrada e comarca de Tabeirós-Terra de Montes" e "Galicia enteira". O acto de entrega terá lugar o 13 de novembro nunha rolda de prensa no Teatro Principal da Estrada.

A Coordinadora de Traballadores/as de Normalización da Lingua (CTNL) retoma o prazo de inscricións nos II Premios Mil Primaveras a proxectos de posta en valor e fomento do galego, logo de interrompelo o pasado mes de marzo por mor da crise sanitaria e o estado de alarma. Os proxectos presentados no primeiro período de participación non terán que se inscribir de novo.

A Asociación Galega de Profesionais da Tradución e da Interpretación (AGPTI) convoca por terceiro ano consecutivo o Premio Xela Arias, co cal busca recoñecer empresas, entidades ou persoas que destaquen pola promoción da tradución ou da interpretación cara a ou desde o galego.

O Concello de Ponteareas convoca a segunda edición do Premio Ponteareas, Lingua e Empresa, para recoñecer e promover o uso do galego no ámbito empresarial.

O xurado da terceira edición do Premio Luís Porteiro Garea á promoción e uso do galego na Universidade de Santiago de Compostela decidiu conceder por unanimidade este premio a Antón Costa Rico, catedrático de Historia da Educación na Facultade de Ciencias da Educación desta universidade.

A Coordinadora de Traballadores/as de Normalización da Lingua (CTNL) decidiu interromper o prazo para presentar proxectos á segunda edición dos Premios Mil Primaveras a proxectos de posta en valor e fomento do galego. A CTNL toma esta decisión por mor da actual crise sanitaria e estado de alarma, situación extraordinaria que dificulta a participación nesta convocatoria. É intención da CTNL abrir un novo prazo de inscrición no momento oportuno para facilitar a participación das entidades destinatarias. Os proxectos xa presentados non terán que inscribirse de novo.
 

A Deputación da Coruña publicou no BOP de do 21 de febreiro de 2020 a convocatoria da décimo primeira edición do premio “Rosalía de Castro” de Lingua. O obxectivo xeral deste galardón é recoñecer a promoción e dignificación social do noso patrimonio lingüístico. O prazo para presentar candidaturas, que finalizaba inicialmente o 30 de abril, está interrompido.

Desde a Coordinadora de Traballadores/as de Normalización da Lingua convocamos a segunda edición dos Premios Mil Primaveras a proxectos de posta en valor e fomento do galego co obxectivo de recoñecer e proxectar o traballo ben feito no ámbito da normalización lingüística, valorar e difundir proxectos positivos e seleccionar boas prácticas que poden servir como modelos. A primeira edición tivo lugar en 2019 e recoñeceu seis proxectos de normalización da lingua.
 

A Universidade de Santiago de Compostela convoca a terceira edición do Premio Luís Porteiro Garea co fin de recoñecer publicamente o esforzo de persoas ou colectivos a prol da normalización do uso do galego na universidade. O premio leva o nome do profesor da cátedra de dereito civil e membro das Irmandades da Fala Luís Porteiro Garea, quen o día 16 de setembro de 1915 pronunciou no Paraninfo da Universidade a primeira lección en galego de que se ten constancia.