Os oitavos Premios Mil Primaveras abren o prazo de inscrición

A Coordinadora de Traballadores/as de Normalización da Lingua (CTNL) convoca a oitava edición dos Premios Mil Primaveras a proxectos de posta en valor e fomento do galego, en colaboración coa Deputación Provincial de Pontevedra.

Estes galardóns naceron en 2019 co fin de recoñecer e difundir o bo traballo que se desenvolve no ámbito da normalización lingüística, favorecer que sexa un labor máis apreciado e comprendido socialmente e compilar accións, proxectos e campañas que poidan servir de modelo ou ser inspiradoras para novas accións. Nas sete edicións anteriores foron premiados trinta e seis proxectos, que se poden consultar neste web.

Poden optar á oitava edición dos premios todas as accións, campañas, programas e proxectos que teñan como obxectivo principal fomentar a lingua e incrementar o seu uso e/ou prestixio e que fosen desenvolvidos total ou parcialmente en 2023, 2024, 2025 ou 2026.

Non se admiten proxectos sen executar nin se premiarán traxectorias de institucións, senón campañas desenvolvidas nalgún/s dos anos indicados. Tampouco se poden presentar aos VIII Premios Mil Primaveras (2026) proxectos recoñecidos nas edicións anteriores.

O xurado dos premios recoñecerá un máximo de catro accións, campañas, programas ou proxectos, sen establecer ningunha xerarquía entre os premios que se outorguen.

 

Presentación de candidaturas e prazo

A inscrición nos Premios Mil Primaveras é voluntaria e deberán realizala as persoas ou entidades responsables das campañas, accións ou programas de normalización lingüística, pois só elas poden describir de forma detallada os aspectos técnicos da súa planificación, xestión, execución e avaliación.

A inscrición de candidaturas farase a través do formulario da pestana Inscricións, que inclúe unha serie de datos obrigatorios: os básicos de identificación do proxecto e da persoa ou entidade responsable, un resumo, unha fotografía de portada e un documento en .pdf para describir en detalle o proxecto. Esta descrición pormenorizada debe incluír polo menos a seguinte información:

• Obxectivos xerais e específicos
• Persoas destinatarias
• Temporalización
• Necesidades e recursos
• Accións, medidas e actuacións concretas
• Avaliación

Opcionalmente poden engadirse materiais que sirvan para completar e exemplificar a descrición técnica: máis fotos, ligazóns a vídeos e a arquivos de son e outro tipo de enlaces.

Non hai límite no número de candidaturas que pode presentar cada entidade ou persoa, sempre que cumpran as bases.

 

Xurado e publicación dos premios

Tras finalizar o período de inscrición de candidaturas, a CTNL nomeará un xurado que as avaliará e escollerá un máximo de catro de acordo cos criterios que se establecen nas bases. O xurado estará formado por técnicos/as de normalización lingüística, responsables de equipos de normalización e dinamización lingüística e persoas que teñan experiencia en dinamización lingüística. Non poderán formar parte del promotores/as de accións candidatas.

Os proxectos que resulten seleccionados polo xurado publicaranse na sección Proxectos premiados tal e como foron subidos polas entidades ou persoas responsables.

 

Recoñecemento e difusión

Os Premios Mil Primaveras non teñen dotación económica; consisten no recoñecemento e difusión das accións, campañas, programas e proxectos como modelos positivos para o traballo en normalización lingüística.

Alén disto, entregarase un galardón identificativo nun acto público que terá lugar nunha data e nun lugar que se determinarán con suficiente antelación. 

 

 

 

Edicións anteriores

A sétima edición dos premios recoñeceu os seguintes proxectos:

• As chaves da lingua
• Comando Le: grupo de activismo cultural de Espazo Lectura
• O Dépor é da Coruña (IES Rafael Dieste da Coruña)
• Revolta Galega (CPI As Revoltas de Cabana de Bergantiños)

 

 

A sexta edición premiou a:

• Brazolinda 
• Galego para peques 
• Modo galego. Actívao! (Real Academia Galega e Concello de Ames)
• Vitamina G (CEIP Sagrada Familia, A Coruña)

 

 

A quinta edición dos premios convocouse en 2023 e recoñeceu os seguintes proxectos:

• Aquí tamén se fala (IES Rafael Dieste, A Coruña)
• CeibaRimas (Merenda Creativa)
• Elos. Engánchate ao galego! (Departamento de Lingua Galega do Concello de Santiago de Compostela)
• Recuncho Gamer  

 

 

A cuarta edición dos Premios Mil Primaveras recoñeceu as seguintes iniciativas:

• Asociación Faladoiros Vigo 
• Caranvexo TV (SNL do Concello de Moaña)
• Laboratorio de Apoderamento Lingüístico (Rexenerando, S. Coop. Galega)
• Na Utopía  

 

 

A terceira edición dos Premios Mil Primaveras recoñeceu os seguintes proxectos:

• Premio ao mellor proxecto estabilizado: Do berce á rúa (SNL do Concello de Narón)
• Premio ao mellor proxecto novo: CantáMOLA en galego (SNL do Concello de Pontevedra)
• Premio á mellor comunicación e impacto: Twitter en galego e Instagram en galego
  
• Premio ao proxecto máis innovador: Somos xogo (Xandobela. Educación e Cultura)
• Premio ao mellor proxecto de fomento do galego na infancia e/ou mocidade: Dicionario galego para boomers (IES Leiras Pulpeiro de Lugo)
• Premio ao mellor proxecto de fomento do galego nun ámbito sectorial: Media Laranxa

Os segundos Premios Mil Primaveras recaeron en:

• Premio ao mellor proxecto estabilizado:  Regueifesta e Enreguéifate (concellos de Ames, Pontevedra, Rianxo, Santiago de Compostela e Teo e promotores da Regueifesta)
• Premio ao mellor proxecto novo: Galeguiza-T (Galeguiza-T)
• Premio á mellor comunicación e impacto: DígochoEu (CRTVG)
• Premio ao proxecto máis innovador: Plan de desconfinamento progresivo da lingua galega (IES Eduardo Blanco Amor de Culleredo)
• Premio ao mellor proxecto de fomento do galego na infancia e/ou mocidade: Projeto Educativo Semente
• Premio ao mellor proxecto de fomento do galego nun ámbito sectorial: Galegoempresas (concellos de Santiago de Compostela, Ames e Teo)
• Mención especial: O galego, a miña lingua propia (Deputación Provincial da Coruña)

Os Premios Mil Primaveras creáronse en 2019 e recoñeceron na súa primeira edición:

• Premio ao mellor proxecto estabilizado: Modelo Burela (IES Perdouro, Burela)
• Premio ao mellor proxecto novo: Falemos de ti e min: a cultura galega desde unha perspectiva integradora (IES de Soutomaior)
• Premio á mellor comunicación e impacto: Desafío 48 h (IES María Casares, Oleiros)
• Premio ao proxecto máis innovador: Proxecto Youtubeir@s (concellos da Baña, A Coruña, Ames, Carballo, Cedeira, Moaña, O Grove, Ourense, Pontevedra, Rianxo, Ribadeo, Santiago de Compostela e Teo, Deputación Provincial da Coruña e universidades da Coruña, Santiago de Compostela e Vigo)
• Premio ao mellor proxecto de fomento do galego na infancia e/ou mocidade: Eu presumo de galego (IES de Melide)
• Premio ao mellor proxecto de fomento do galego nun ámbito sectorial: GCiencia (Ciencia Galega Industrias Creativas, S.L.)

Os Premios Mil Primaveras promóveos e organízaos a CTNL coa colaboración económica da Deputación Provincial de Pontevedra.